Kemur til landsins í kvöld í nýjum lit

Þyrla Landhelgisgæslunnar, TF-SYN, er væntanleg til landsins í kvöld en hún hefur undanfarna mánuði verið í umfangsmikilli skoðun og viðhaldi í Noregi. Þetta kemur fram í tilkynningu frá Landhelgisgæslunni.

Nætursjónaukabúnaður var settur í þyrluna sem gerir hana mun hæfari til leitar-, björgunar- og eftirlitsstarfa hér við land. Þyrlan var einnig máluð í nýjum áberandi appelsínurauðum lit sem til stendur að allar þyrlur Landhelgisgæslunnar beri í framtíðinni.

Í tilkynningu segir að Landhelgisgæslan telji litinn hæfa björgunarþyrlunum betur þar sem hann er mjög áberandi og auðkennandi fyrir björgunartæki. Algengt er að björgunarþyrlur og flugvélar, sérstaklega á Norðurslóðum, séu málaðar í áberandi litum.