Hafa gefið rúma fjóra milljarða til SOS Barnaþorpanna

Á þeim tuttugu og fimm árum sem liðin eru frá stofnun SOS Barnaþorpanna á Íslandi hafa landsmenn stutt starf samtakanna um 4,3 milljarða en þetta kemur fram í fréttatilkynningu frá samtökunum.

Meira en 85% upphæðarinnar hefur nýst í verkefni samtakanna erlendis þar sem að umsýslukostnaður SOS á Íslandi hefur aldrei verið yfir 15%.

Um 12 þúsund Íslendingar eru styrktaraðilar SOS Barnaþorpanna á Íslandi. Þar af eru 6000 manns styrktarforeldar, en þeir aðilar styrkja eitt ákveðið barn. Alls hafa Íslendingar verið styrktarforeldrar 14 þúsund barna á síðastliðnum 25 árum.

„Þegar maður skoðar listann yfir þá sem gerðust styrktarforeldrar á fyrstu árunum, í kringum 1990, kemur skemmtilega á óvart hve margir þeirra eru enn að styrkja börn. Þau börn sem þeir styrktu fyrst hafa lokið námi og eru komin með fjölskyldu og vinnu, svo styrktarforeldrarnir hafa tekið að sér ný og yngri börn í staðinn. Svona á barnahjálparstarf að vera. Árangurinn er svo áþreifanlegur,“ segir Ragnar Schram, framkvæmdarstjóri SOS Barnaþorpanna á Íslandi.

Í tilefni 25 ára afmælis SOS Barnaþorpanna á Íslandi er alþjóðaforseti samtakanna, Siddartha Kaul, kominn til landsins. Hann verður hér um helgina og mun meðal annars fara á fund með forseta Íslands.

Kaul er Indverji en hann var kosinn alþjóðaforseti SOS árið 2012. Hann er aðeins þriðji einstaklingurinn til þess að gegna embætti alþjóðaforseta SOS Barnaþorpanna frá upphafi en hann er fyrsti forseti samtakanna sem ekki er austurrískur, en samtökin voru stofnuð í Austurríki árið 1949.

Kaul er starfi samtakanna vel kunnugur en faðir hans, J.N. Kaul var einn af stofnendum SOS á Indlandi á sjöunda áratugnum. Þá starfaði Siddartha Kaul fyrir samtökin á Indlandi og Sri Lanka frá árinu 1978.