Fyrrverandi formaður Pókersambandsins sakaður um fjárdrátt

Ný stjórn Pókersambands Íslands undirbýr nú kæru á hendur fyrrum formanni og gjaldkera samtakanna vegna fjárdrátts.

„Það eina sem ég vil segja um málið er að þetta er harmleikur,“ segir Davíð Þór Rúnarsson, núverandi formaður Pókersambandsins.

„Svona getur gerst allsstaðar, í Pókersambandinu, í sjómannafélagi í Grindavík, bara hvar sem er,“ segir Davíð.

Í tilkynningu á heimasíðu Pókersambandsins kemur fram að gjaldkerinn hafi einn haft aðgang að reikningum félagsins og séð alfarið um fjármál þess.

„Viðkomandi gekk á sjóði félagsins eins og þeir væru hennar eigin,“ segir í tilkynningunni.

Nýtti sér mistök PokerStars

Gjaldkerinn á að hafa nýtt sér mistök sem fyrirtækið PokerStars gerði, þegar það millifærði fjárhæð inn á reikning Pókersambandsins í evrum, en fjárhæðin átti að vera í dollurum. Pókersambandið og PokerStars gerðu með sér samning um að undankeppni Íslandsmótsins í póker skyldi leikin í gegnum netið, á heimasíðu PokerStars.

Fyrir þennan samning borgaði PokerStars en gerði þau mistök að millifæra í röngum og sterkari gjaldmiðli og borguðu því í raun meira en til stóð.

Fyrirtækið fór fram á leiðréttingu á þessari greiðslu en þá mun gjaldkerinn hafa verið búin að átta sig á mistökunum.

„Auk þess falsaði viðkomandi bankakvittun til að fela fyrir öðrum stjórnarmeðlimum mistökin sem áttu sér stað hjá PokerStars,“ eins og segir í tilkynningunni.

Gekkst við brotunum

Í tilkynningunni kemur fram að gjaldkerinn hafi játað brot sitt.

„Hefur hún gengist við að hafa tæmt sjóði Pókersambandins og að hafa nýtt sér mistökin sem áttu sér stað hjá Pokerstars. Verið er að vinna í að borga upp skuldir sem fyrir eru og byggja upp fjárhag félagsins. Til þess höfum við meðal annars haldið partý kvöld og aðra viðburði sem geta hjálpað okkur að safna þeim pening sem til þarf.“

Fréttastofa hafði samband við viðkomandi vegna málsins. Hún vildi ekki tjá sig um málið.