Hertar verkfallsaðgerðir vegna Herjólfs

Sjómannafélag Íslands hefur tilkynnt Samtökum atvinnulífsins að verkfallsaðgerðir undirmanna á Herjólfi verði hertar og að ferjan muni ekki sigla á föstudögum, frá og með næstu helgi. Þar með myndi hún aðeins sigla fjóra daga í viku, ef ekki semst, því nú þegar eru engar helgarsiglingar í gangi.

Vegna yfirvinnubanns getur ferjan aðeins siglt eina ferð á dag til Þorlákshafnar þá daga, sem siglt er á annað borð. Eftir að aðgerðirnar hófust hafa verið miklar annir hjá Flugfélaginu Erni, sem flýgur alla daga til Eyja og bætir við aukaferðum eftir þörfum. Félagið er til dæmis þegar búið að bóka í fjórar ferðir í dag, að því er fram kemur í Eyjafréttum.