Í vikulanga óvissuferð um Ísland

Jennifer Asmundsson, frá Seattle í Bandaríkjunum, mun ferðast um landið í vikutíma undir fararstjórn rúmlega 100 þúsund fylgjenda Inspired  by Iceland á samfélagsmiðlum. Hún var valin úr hópi rúmlega 4.500 umsækjenda alls staðan að úr heiminum og hefur hlotið titilinn Hugrakkasti ferðamaðurinn.

Í tilkynningu frá Inspired by Iceland segir að átakið hafi undanfarið leitað eftir tillögum að skemmtilegum áfangastöðum og  ævintýralegri lífsreynslu á samfélagsmiðlum sínum. Við því brást fjöldi fólks við og sendi inn hugmyndir sem nýttar verða til að skipuleggja sjö daga ferð um landið.

Jennifer er af íslensku bergi brotin, en afi hennar var fæddur á Íslandi og fluttist ungur til vesturheima.

„Þetta er ótrúlegt tækifæri. Ég er kokkur, og  afi minn var Íslendingur. Hann dó þegar ég var ung, áður en hann gat kennt mér neitt um tungumálið, eða íslenskar matarhefðir. Ég er mjög spennt að fræðast um Ísland, og læra um jarðhita og íslenskar matarvenjur og uppgötva leyndarmál Íslands frá fyrstu hendi,“ segir Jennifer.

Ævintýraför Jennifer hefst í dag, en með henni í för verða kvikmyndagerðamenn sem munu gera –heimildamynd um ferðalagið.

Leikurinn er hluti af Share the secret herferðinni sem Inspired by Iceland hefur staðið fyrir í vetur. Inga Hlín Pálsdóttir, forstöðumaður ferðaþjónustu og skapandi greina hjá Íslandsstofu segir Ísland fullt af ævintýralegum tækifærum sem fáir vita af og séu einfaldlega ekki á kortinu hjá erlendum ferðamönnum.

„Höfuðborgin og hver og einn landshluti býr yfir spennandi svæðum, fólki, skemmtilegri menningu, góðum mat, töfrandi slóðum og afþreyingu. Við viljum því gefa ferðamönnum tækifæri til að uppgötva íslensk ævintýri um allt land og ekki síður að gefa Íslendingum tækifæri á að benda ferðamönnum á það sem þeir ættu ekki að láta framhjá sér fara sem hægt er að upplifa allan ársins hring,“ segir Inga Hlín.