Páll Matthíasson skipaður forstjóri Landspítalans

Kristján Þór Júlíusson heilbrigðisráðherra hefur skipað Pál Matthíasson til að gegna embætti forstjóra Landspítala til næstu fimm ára.

Þetta kemur fram í tilkynningu frá Velferðarráðuneytinu í dag. 

Lögskipuð nefnd sem mat hæfni umsækjenda taldi Pál hæfastan en skipun hans tekur gildi þann 1. apríl. Þrír aðrir sóttu um stöðuna sem var auglýst í lok janúar.

Páll Matthíasson hefur átt sæti í framkvæmdastjórn Landspítala og í október 2013 var hann settur forstjóri sjúkrahússins.

Kristján Þór Júlíusson heilbrigðisráðherra segir meðal annars um ráðningu Páls að hann horfi til þess hvernig honum hefur tekist að „byggja upp traust milli stjórnenda og starfsfólks spítalans. Þetta traust er grundvallaratriði og forsenda þeirrar samvinnu sem verður að vera fyrir hendi til þess að gera Landspítala að enn öflugra sjúkrahúsi allra landsmanna,“ er haft eftir Kristjáni í tilkynningunni.