Duglegir drengir fjarlægðu svell af sparkvelli

Fimm piltar úr Lindahverfinu í Kópavogi voru búnir að fá nóg af því að komast ekki út í knattspyrnu vegna svellbunka sem var á gervigrasinu við Lindaskóla. Þeir gerðu sér lítið fyrir og mættu með skóflur á völlinn í gær og fjarlægðu allan klakann af vellinum.

Að verki loknu var í fyrsta sinn á árinu hægt að spila knattspyrnu á vellinum. Talið er að vegna veðurs hafi ekki verið hægt að spila fótbolta á vellinum í 132 daga.

Íbúar í Lindahverfi reiknuðu út að svellbunkinn sem strákarnir fjarlægðu í gær hafi vegið eitt og hálft tonn.

Sannarlega duglegir piltar þarna á ferð.