Friðurinn slitinn ef ekki verður þjóðaratkvæðagreiðsla

Formaður Já-Ísland segir að ef stjórnvöld verði ekki við ákalli þjóðarinnar um þjóðaratkvæðagreiðslu um framhald aðildarviðræðna við Evrópusambandið  sé búið að slíta friðinn í samfélaginu. Fleiri hafa skrifað undir áskorun til ríkisstjórnarinnar um að falla frá slitum aðildarviðræðna við Evrópusambandið og boða til þjóðaratkvæðagreiðslu um framhald viðræðnanna en kusu Sjálfstæðisflokkinn í síðustu kosningum.

Sjálfstæðisflokkurinn hlaut flest atkvæði allra flokka í síðustu Alþingiskosningum í fyrra vor, 50.454 atkvæði. Undiraskriftarsöfnun Já-Ísland um að stjórnvöld falli frá því að draga aðildarumsókn Íslands að Evrópusambandinu til baka og boðað verði til þjóðaratkvæðagreiðslu um framhald viðræðna hefur staðið yfir í um þrjár vikur.

Jón Steindór Valdimarsson, formaður samtakanna, segir undirskriftirnar nú þegar orðnar fleiri en nokkur stjórnmálaflokkur fékk í kosningunum síðasta vor. Hann segir enga málamiðlun felast í hugmyndum Bjarna Beneditkssonar fjármálaráðherra um að tillaga utanríkisráðherra um viðræðuslit fari í þjóðaratkvæðagreiðslu.

„Þær hugmyndir eru algerlega út í hött. Algerlega ótækar og snúast ekkert um ákall þjóðarinnar til stjórnvalda. Þannig að það er algerlega ótækt,“ segir Jón Steindór.

Söfnun undirskrifta haldi eitthvað áfram en hann reiknar með að þær verði afhentar eftir viku eða tíu daga, þegar rannsóknarfyrirtæki hefur kannað undirskriftirnar með úrtaki. Nokkur hundruð undirskriftir til viðbótar skipti ekki öllu máli þegar fjöldinn sé orðinn þetta mikill.

Jón Steindór segir enga málamiðlun felast í þjóðaratkvæði um aðrar tillögur eða láta málið sofna í utanríkismálanefnd.

„Þetta er mjög skýrt. Það er ekkert svigrúm til neinna málalenginga eða útúrsnúninga í því. Annað hvort svara menn þessu ákalli eða ekki og ef menn gera það ekki eru menn búnir að slíta friðinn í þessu samfélagi,“ segir Jón Steindór Valdimarsson formaður Já-Ísland.