Gagnrýna samkomulag Noregs, ESB og Færeyja

Umhverfis- og auðlindanefnd Norðurlandaráðs gagnrýnir nýgerðan samning Noregs, Færeyja og ESB um makrílveiðar. Samningurinn felur samkvæmt nefndinni í sér töluvert meiri veiðar en veiðiráðgjöf Alþjóða hafrannsóknaráðsins.

Þetta kemur fram á vef Atvinnuvega- og Nýsköpunarráðuneytisins, þar sem vísað er í tilkynningu frá Norðurlandaráði.

Sjúrdur Skaale talsmaður nefndarinnar segir það algert grundvallaratriði að þjóðir haldi sig við innan ramma veiðiráðgjafar. Mikilvægt sé að strandríkin öll nái samkomulagi sín á milli um ákvörðun heildarafla og skiptingu hans.

Í ljósi þess að of oft komi upp ágreiningur um þessi mál þá sé það jafnframt mikilvægt að ríkin sem hlut eigi að máli  komi sér saman um traustan lagalegan grundvöll til að byggja á ákvarðanir um veiðar á uppsjávarfiski og flökkustofnum.