Meintir innbrotsþjófar náðust á mynd

„Með því að gera þetta svona eiga þeir erfiðara með að selja þetta. Ég sé líka enga ástæðu til að leyna þessu,“ segir Steinar Sigurgeirsson í samtali við Vísi. Hann birti í gær myndir á Facebooksíðu sinni sem hann segir sýna menn keyra í burtu eftir að hafa rænt frá honum.

Síðastliðinn sunnudag var hringt í Steinar þegar hann var út á sjó og honum sagt að verið væri að brjótast inn hús sem hann hefði til nota á Hólabrekku á Garðskaga.

„Hurðir voru brotnar upp og öllu ruslað til og tekið talsvert af mínum eigum, þar á meðal stór loftpressa blá að lit verkfærakista með mörgum skúffum Lítil talía og fleira.“

Á Facebook nafngreinir Steinar tvo menn sem hann segir að hafi brotist inn í húsið og segir þá hafa þekkst á vettvangi.

„Nú vildi svo skemmtilega til að verið var að taka myndir þarna nærri og þess vegna er til mynd af þeim þar sem þeir keyra í burtu með loftpressuna aftan á kerru, en kerrunni var einnig stolið í Sandgerði,“ skrifaði Steinar.

„Það er búið að gefa honum kost á að skila þessum hlutum en hann hefur ekki sinnt því, þannig að ef þetta verður boðið einhverjum til kaups vil ég benda fólki á að þetta er þýfi,“ skrifaði Steinar.

Pistill Steinars hefur fengið mikla athygli á Facebook og hefur verið deilt yfir 1.200 sinnum. „Ég átti nú ekki von á því að viðbrögðin yrðu svona svakaleg. Það snjóar deilingum á pistlinum.“ Steinar hefur ekki fengið nein viðbrögð frá mönnum sem hann kom skilaboðum til. Lögreglan á Suðurnesjum hefur málið til rannsóknar.