Kirkjan heldur ólögmætri gjaldtöku til streitu

Þjóðkirkjan hefur rukkað aðstandendur látinna um ólögleg gjöld í 17 ár. Þetta kemur fram í úttekt Kjarnans í dag.

Gjaldið varðar kirkjuvörslu við útfarir sem yfirleitt er á bilinu 6000 - 12.500 kr. og einskorðast gjaldtakan við sóknarkirkjur á höfuðborgarsvæðinu.

Upphæðin á að dekka kostnað kirkna við að kalla út starfsmenn á frídögum sem margir hverjir eru í hlutastarfi.

Kirkjuvörslugjaldatakan var kærð af Félagi íslenskra útfarastjóra til Umboðsmanns Alþingis árið 2011 sem leitaði álits hjá Innanríkisráðuneyti sem skilaði áliti sínu í febrúar í fyrra



„Ráðuneytið komst að þeirri niðurstöðu að gjaldtakan ætti sér enga stoð í lögum, og þá gilti engu hvort umrædd þjónusta væri hluti af lögmætri þjónustu eða ekki“ , segir í úttektinni.



Þó erfitt sé að reikna út hvað hin ólöglega gjaldtaka hefur skilað sóknarkirkjum á höfuðborgarsvæðinu áætlar Kjarninn að gjaldið færi þeim hátt í fimm milljónir króna á ári.

Ráðuneytið hefur ítrekað afstöðu sína við Biskupsstofu en gjaldtökunni er haldið áfram.  Enda er það svo að Biskupsstofa álítur Þjóðkirkjuna sem sjálfstætt trúfélag og sóknir hennar sem frjáls félög.



Biskupsstofa telur því sóknir kirkjunnnar ekki þurfa að sækja heimildir til ríkisvaldsins og þeim í sjálfsvald sett að ákveða starfsemi sína og gjaldtöku.  

Þó enn eigi eftir að úrskurða fyrir dómstólum hvort gjaldtakan standist lög er ljóst að umrædd gjaldtaka er enn við lýði í flestum sóknarkirkjum á höfuðborgarsvæðinu sem Innanríkisráðuneytið hefur úrskurðað ólögmæta.