Lögreglan eltist við lasermann

Lögregla fékk tilkynningu um klukkan hálf ellefu í gærkvöldi um að verið væri að beina sterkum Laser geisla úr fjölbýlishúsi í Hólahverfi.

Honum var meðal annars beint að strætisvagni á ferð, sjúkraflugvél og lögreglubíl, væntanlega í þeim tilgangi að trufla stjórnendur þessara farartækja. Þrátt fyrir að lögreglumenn hafi nokkurnveginn getað staðsett sendinn, dugði það ekki til að finna hann eða handtaka neinn, en þung viðurlög liggja við slíku. Nýverið gerði Tollgæslan upptæka nokkra Lasersenda sem verið var að flytja til landsins í pósti og voru þeir allir með margfaldan styrkleika umfram það, sem leyft er hér á landi.