Eldur á Krossanesi

Eldur gaus upp í einni af 60 vélasamstæðum í aflþynnuverksmiðju Becromal á Krossanesi við Akureyri laust fyrir klukkan tvö í nótt og forðuðu starfsmenn sér þegar út.

Þegar Slökkviliðið á Akureyri kom á vettvang logaði töluverður eldur í samstæðunni og voru reykkafarar sendir inn. Þeir náðu að slökkva eldinn áður en hann næði frekari útbreiðslu. Töluverður reykur hafði þá myndast í verksmiðjunni, en öflugri loftræstingu í húsinu og búnaði slökkviliðsins var beitt við að reykræsta. Ekki liggur fyrir hvað tjónið er mikið í krónum talið, en óveruleg truflun varð á framleilðslunni. Eldsupptök eru ókunn.