Vonandi risastórt skref

„Ég er mjög bjartsýnn á að þetta sé risastórt skref í frekari samstarfi á milli þessara þjóða,“ segir Gunnar Bragi Sveinsson, utanríkisráðherra.

Utanríkis- og varnarmálaráðherrar Norðurlanda funda á Íslandi um aukið samstarf í öryggis- og varnarmálum. Í morgun hittust þeir í Reykjavík og í hádeginu voru þeir mættir á gamla varnarsvæðið í Keflavík á fund sem ber yfirskriftina Iceland Air Meet 2014.

Á sama tíma stunda flugsveitir Norðmanna, Svía og Finna flugæfingar á Íslandi. „Menn heimsóttu í morgun sitt fólk og sínar flugsveitir og það var mikil ánægja með allt saman,“ segir Gunnar Bragi.

„Í dag höfum við fyrst og fremst rætt um hvernig við getum unnið betur saman þegar kemur að öryggis- og varnarmálum. Við ræddum hvað við getum lagt af mörkum til að koma í veg fyrir átök. Norðurlandaþjóðirnar hafa gott orðspor um allan heim og þar getum við lagt töluvert af mörkum,“ segir hann.

„Við ræddum líka öryggismálin á norðurskautinu. Þar eru allir sammála um að beina athyglinni að umhverfismálum og öryggi borgaranna. Við sjáum ekki fyrir okkur í náinni framtíð einhvers konar hernaðarógn eða hernaðarspennu þar.“

Gunnar Bragi bætti við að rætt hafi verið um að auka norrænt samstarf í friðargæsluverkefnum á vegum Sameinuðu þjóðanna. „Þar geta þjóðirnar nýtt alla þá þekkingu sem þær hafa.“