Vilja flytja héraðsdóm af Lækjartorgi

„Við vildum leggja fram formlega tillögu um að hefja viðræður við innanríkisráðuneyti um að færa héraðsdóm,“ segir Dagur B. Eggertsson í samtali við Vísi. 

Dagur upplýsti á Fésbókarsíðu sinni fyrr í dag að lagt hafi verið fram bréf á borgarráðsfundi þar sem borgin óskar eftir viðræðum við innanríkisráðuneytið um flutning Héraðsdóms Reykjavíkur af Lækjartorgi, á lögreglustöðvarreitinn við Hlemm.

„Dómhúsið sogar til sín orku og smitar engri gleði á Lækjartorg, sem okkur þykir óþarflega dautt. Okkur langar að lífga við Lækjartorg,“ segir Dagur um tillöguna sem enginn í borgarstjórn hafi mótmælt. Í tillögunni var bent á þá miklu byggingarmöguleika sem væru til staðar á bakvið lögregluhúsið við Hlemm.

„Þá væri hægt að hafa héraðssdóm, nýtt millidómsstig og lögregluna allt á sama stað.“