Leiða verkefni sem gæti valdið straumhvörfum í evrópskum sjávarútvegi

Ísland er í forystuhlutverki í þróun fjölstofna fiskveiðistjórnunarkerfis sem gæti gjörbylt sjávarútvegi í Evrópu. Íslendingar fá tæplega 300 milljóna króna styrk frá Evrópusambandinu til að vinna að verkefninu. Styrkurinn er meðal stærstu verkefnastyrkja sem veittir eru í Evrópu á þessu sviði.

Matís og Háskóli Íslands gegna forystuhlutverki í nýju umfangsmiklu fjölþjóðaverkefni sem hefur hlotið 275 milljóna króna styrk frá sjöundu rannsóknaráætlun Evrópusambandsins til næstu fjögurra ára. Verkefnið kallast MareFrame og hlaut 14 stig af 15 mögulegum í mati fagnefndarinnar sem veitti styrkinn.

„Við erum að fara að þróa fjölstofna fiskveiðistjórnunarkerfi. Það er nýtt að því leyti að innleitt er í kerfið vistvæna, sjálfbæra og félagslega hagræna þætti,“ segir Anna Kristín Daníelsdóttir, sviðstjóri hjá Matís.

Ofveiði á fiskistofnum í Evrópu

Þrír af hverjum fjórum fiskistofnum Evrópusambandsins eru ofveiddir í dag og því mikil þörf fyrir nýjar leiðir í fiskveiðistjórnun.

„Evrópusambandið hefur verið að vinna að endurskoðun á sínu fiskveiðistjórnunarkerfi. Útkoman úr þessum verkefnum mun að hluta til endurskoða þeirra kerfi,“ segir Anna Kristín.

Íslendingar í fararbroddi

Einn þeirra sérfræðinga sem taka þátt í verkefninu er Andre Punt, prófessor við Háskólann í Washington. Hann hefur sérhæft sig í rannsóknum á fiskveiðistjórnunarkerfum og telur eðlilegt að Íslendingar stýri verkefninu enda í fararbroddi í fiskveiðistjórnun í heiminum.

„Það sem við höfum séð til þessa lofar góðu,“ segir Punt. „Þetta verkefni mun skila afar nýstárlegum vísindaniðurstöðum og við sjáum fyrir okkur samstarf milli landa sem mun gagnast við fiskveiðistjórnun um langa framtíð.

Stefnið þið að því að gjörbylta fiskveiðikerfinu í Evrópu?

„Já, við stefnum að því að gera það og erum bjartsýn,“ segir Anna Kristín.