Bruni við Laufásveg: Ferðamaður missti eigur sínar

Tilkynning barst um eld í bakhúsi við Laufásveg 41 um klukkan fjögur í dag en þar var gufubað sem tilheyrði gistihúsinu Baldursbrá. Megna reykjarlykt lagði um svæðið og þegar slökkvilið kom á staðinn skömmu síðar var bálið mikið, að sögn Sigurðar Lárusar Fossberg, varðstjóra á staðnum. Var því kallað á liðsauka frá slökkviliðinu í Árbæ og lokaði lögreglan nærliggjandi götum. Að sögn sjónarvotta teygðu eldtungurnar sig marga metra upp í loftið og í nærliggjandi tré. Örskammt er í næstu hús, sem eru úr timbri og var óttast að eldurinn breiddist út um hverfið þar sem eru mörg gömul timburhús. Sigurður segir mikla hættu skapast við þessar aðstæður en að vel hafi farið í þetta sinn.

Enginn var í gufubaðinu þegar eldurinn kom upp og ekki urðu slys á fólki. Gufubaðið er hins vegar gjörónýtt. Þá skemmdust eigur ferðamanns sem hafði skráð sig út af gistiheimilinu í hádeginu en fengið að geyma þær í húsinu sem brann.