Tólf bílar teknir úr umferð á Selfossi

Lögreglan í Árnessýslu tók skráninganúmer af 12 ótryggðum ökutækjum á Selfossi í gær.

Frá áramótum hefur lögreglan á Selfossi tekið 25 ökutæki úr umferð í Árnessýslu vegna þess að eigendur þeirra höfðu látið undir höfuð leggjast að halda ábyrgðartryggingu þeirra í gildi. 

Þetta er mjög hátt hlutfall ökutækja sem hafa verið tekin úr umferð af þessari ástæðu á svona skömmum tíma.  Síðastliðið ár komu upp tilvik þar sem ótryggð ökutæki lentu í umferðaróhöppum. 

Í slíkum tilvikum getur tjónþoli staðið uppi með tjón sem hann fær ekki bætt.  Lögreglan á Selfossi mun halda áfram að fylgjast með þessum þætti í umdæmi sínu. 

Sekt við þessu broti er 30.000.00 krónur sem lendir á skráðum eiganda eða umráðamanni ökutækisins.