Segir Sigurð hafa lokkað fólk til þess að leggja fram fé

Sigurður Kárason notaði fjórar aðferðir til þess að fá fólk sem hann er nú ákærður fyrir að hafa blekkt til að afhenda sér fé að því er fram kom í málflutningi sækjanda fyrir dómi í dag. Saksóknari fer fram á þriggja ára fangelsi.

Sigurði er gefið að sök að hafa svikið út 117 milljónir króna af 15 manns. Til þess að hafa fé af fólkinu sagðist hann ýmist ætla að nýta féð til gjaldeyrisviðskipta, til kaupa á krónubréfum, stofnbréfum og við gjaldeyriskaupasamninga. Fólkið átti svo að njóta ávöxtunar sem yrði til vegna viðskipta Sigurðar.

Segir hann hafa spilað á mannlegar tilfinningar

Sækjandi sagði Sigurð hafa lokkað fólk og fengið það til þess að leggja fram fé með gylliboðum. Í einstaka tilvikum hefði Sigurður skilað fullri greiðslu til baka eða því sem hann sagði ávöxtun. Þannig hafi hann fengið fólk til þess að greiða meiri pening.

Einnig hafi hann fengið meiri pening frá fólki með því að segja því að sem dæmi að hann væri fastur með gjaldeyriskaupasamning. Til þess að klára samninginn þyrfti hann meiri pening frá fólkinu.

Sækjandi sagði Sigurð hafa spilað á mannlegar tilfinningar. Fólkið sem hann er sakaður um að hafa blekkt hafi verið undir mikilli pressu. Í öllum þeim tilvikum sem ákært er hafi það orðið til þess að fólkið lét meiri pening af hendi. Fólk hafi verið í angist og eðlilegt sé að fólkið hafi frekar reynt að fá peninginn sinn til baka en að játa sig sigrað.

Hann sagði það sláandi að framburður fólksins væri allur á sama veg. Aðferðin sem Sigurður beitti væri ekki óþekkt blekkingaraðferð. Á alþjóðlegum vettvangi væri aðferðin kennd við Nígeríubréf.

Kom fyrir sjónir sem ábyrgur og trúverðugur

Sækjandi benti á að Sigurður væri eignalaus og hefði meðal annars gengist undir gjaldþrotaskiptameðferð. Þrátt fyrir það hafi hann látið líta svo út að hann væri reyndur í viðskiptum og vel stæður. Vitnin hafi lýst því að Sigurður hafi komið þeim fyrir sjónir sem ábyrgur og trúverðugur maður sem gat útskýrt viðskipti. Hann hefði gefið til kynna að hann væri fjársterkur maður með mikil umsvif. Hann hafi komið einstaklega vel fyrir og verið afar sannfærandi.

Fólkið sem Sigurður á að hafa blekkt eri úr öllum stigum þjóðfélagsins að sögn sækjandans. Bæði menntað fólk og ómenntað, fólk í vinnu og sjúklingar. Aðeins örfáir þeirra sem Sigurður hafi verið í samskiptum við áttu sjóði og greiddu Sigurði með fé úr þeim. Margir hafi hins vegar tekið yfirdrátt eða lán fyrir því sem þeir létu Sigurð fá. Tjónið sé mjög tilfinnanlegt fyrir marga.