Lömdu og rændu unga stúlku

Framhald á aðalmeðferð fór fram fyrir Héraðsdómi Reykjavíkur í máli þriggja kvenna og eins karlmanns vegna líkamsárásar á tvær ungar konur í Hafnarfirði haustið 2010.

Konurnar þrjár voru 16, 17 og 18 ára þegar brotið var framið og karlmaðurinn var 19 ára. Tvær þeirra veittust að öðru fórnarlambinu sem var þá 19 ára með spörkum í bak jafnframt sem þær slógu hana í andlitið með höndunum og með spýtu í lærið. Þær hræktu á hana og hótuðu henni líkamsmeiðingum ef hún myndi kæra atvikið til lögreglu. Önnur þeirra hótaði konunni með hníf og skipaði henni að afhenda sér debetkort og gefa sér pin númer kortsins. Ákærðu fóru svo öll saman í hraðbanka og tóku þaðan út 25 þúsund krónur af reikningi stúlkunnar.

Þriðja konan sem var 16 ára þegar árásin átti sér stað er ákærð fyrir að hafa slegið ungu konurnar í andlit og í fætur annarrar með spýtu.

Karlmaðurinn er ákærður fyrir að hafa farið með stúlkunum á sínum tíma í hraðbanka vitandi hvernig debetkortið var fengið.  

Konurnar tvær sem ráðist var á fara fram á bætur, önnur að upphæð rúmla 800 þúsund og hin rúmlega 600 þúsund.