Lögreglan með óskilamuni á Pinterest

Lögreglan á höfuðborgarsvæðinu hefur opnað Pinterest síðu til þess að einfalda fólki að finna aftir hluti sem það hefur týnt.

Síðan opnaði í byrjun janúar en lögreglan er að byrja að kynna hana núna. „Við vildum safna inn á síðuna fyrst, þannig að eitthvað væri komið inn á hana,“ segir Selma Dögg Ragnarsdóttir, í óskilamunum hjá lögreglunni á höfuðborgarsvæðinu.

Nú getur fólk skoðað óskilamuni heiman frá sér í þess þess að mæta á lögreglustöðina og stendur von lögreglunnar til þess að síðan eigi eftir að nýtast fólki vel. Hugmyndin er að þetta sé aðgengilegra og einfaldara fyrir borgarana.

„Það er mjög mikið af hjólum og ótrúlega mikið sem kemur inn á gsm-símum,“ segir Selma sem segir lögregluna alltaf reyna að koma hlutunum aftur til eiganda sinna en það sé ekki alltaf auðvelt og stundum ekki hægt.

Flesta munina í óskilamunageymslu lögreglunnar hefur fólk sem fann þá komið með. Selma segir að það sé talsvert um að fólk leiti til lögreglunnar að týndum hlutum en þó mætti vera meira af því en mikið hafi safnast af dóti þar sem mætti fara út.

Mest kemur af reiðhjólum og símum en líka gleraugum og myndavélum. Lögreglunni berast líka töskur og pokar með fötum og veski án skilríkja. En í þeim séu oft persónulegir munir sem fólk vilji líklega fá til baka sé þess kostur.