Markviss notkun skimunarprófa skilar árangri í Reykjanesbæ

Skimunarprófið leið til læsis er lagt fyrir í fyrsta bekk í grunnskólum Reykjanesbæjar um mánaðamótin september október ár hvert en þetta kemur fram í fréttatilkynningu frá Reykjanesbæ.

Prófið gefur kennurum upp nákvæma stöðu nemenda í hljóðkerfis og hljóðavitund, bókstafa og hljóðaþekkingu og málskilningi og orðaforða. Hingað til hefur prófið einungis verið notað til að auka gæði kennslu í grunnskólum bæjarins. 

Ákveðið var að greina niðurstöður nemenda enn frekar eftir því á hvaða leikskólum þau höfðu verið. Að því búnu var niðurstöðum skilað til hvers leikskóla fyrir sig, þar sem niðurstöður prófs sem lagðar eru svo snemma fyrir í grunnskóla gefa einnig sterkar vísbendingar um það hversu vel nemendur eru undirbúnir til grunnskólagöngu.

Niðurstöður voru strax notaðar til að rýna í innra starf leikskólanna. Prófið hefur ekki verið notað með þessum hætti áður að sögn Gylfa Jóns Gylfasonar fræðslustjóra sem sagði ánægjulegt að geta nýtt upplýsingarnar á báðum skólastigum.

Gylfi segir að markviss notkun skimunarprófa sé hluti af verklagi Framtíðarsýnar Reykjanesbæjar, Sandgerði og Garðs sem miðar að því að koma leik og grunnskólum sveitarfélaganna í fremstu röð á landsvísu.

Hluti af  þessari framtíðarsýn er að stjórnendur í skólunum deili niðurstöðum skimunarprófa með það að markmiði að allir skólar tileinki sér þá kennsluhætti sem reynslan sýnir að virkar best.

Skilvirk kennslufræði dreifist því hratt á milli skóla á Reykjanesi. Unnið hefur verið eftir þessu verklagi í þrjú ár og hafa miklar námslegar framfarið orðið í grunnskólum sveitarfélaganna, auk þess sem börn koma nú betur undirbúin undir grunnskólagöngu en áður í móðurmáli og stærðfræði.