Hættuástand víða við háspennulínur

Hættulega stutt er upp í háspennulínur víða á landinu vegna mikillar snjókomu í vetur. Þar sem ástandið er verst hefur verið gripið til þess ráðs að moka eða ryðja frá línum og setja upp merkingar. Landsnet greinir frá.

Aðstæður eru sérstaklega varasamar á Norðurlandi eystra, Austurlandi og Vestfjörðum. Á þessum slóðum er enn víða mjög stutt upp í línuleiðara. Því eru allir sem ætla að fara á fjöll, bæði vélsleða-, skíða- og göngumenn, hvattir til að fara með mikilli gát nærri háspennulínum og möstrum. Sum staðar er hæðin upp í leiðara aðeins einn til tveir metrar og á öðrum stöðum hefur línur fennt í kaf.

Búið er að moka eða ryðja frá línum og setja upp merkingar þar sem ástandið er verst. Eftir sem áður er mikilvægt að allir sem eru á ferð til fjalla sýni aðgát.

Hægt er að leita frekari upplýsinga um aðstæður á einstökum línuleiðum hjá stjórnstöð Landsnets í síma 563 9401 eða með því að senda tölvupóst á netfangið stjornstod@landsnet.is