Hóta að flytja Kvikmyndasafnið

Mennta- og menningarmálaráðuneytið gagnrýnir bæjarstjórn Hafnarfjarðar fyrir að setja áframhaldandi starfsemi Kvikmyndasafns Íslands í Bæjarbíói í uppnám í nýlega samþykktum samningsdrögum bæjarins.

Ráðuneytið segir að með breytingum á samningi Kvikmyndasafnsins við bíóið séu upphaflegar forsendur fyrir flutningi safnsins í Hafnarfjörð orðnar að engu.

Hvergi sé gert ráð fyrir að Bæjarbíó haldi áfram að vera heimili Kvikmyndasafnsins og samstarf við önnur kvikmyndasöfn í Evrópu og möguleikar á styrkjum til endurbóta á Bæjarbíói þar af leiðandi í uppnámi.

Þess er krafist að Hafnarfjarðarbær falli frá þeim breytingum sem samningsdrögin kveða á um starfsemi hússins ellegar muni Kvikmyndasafnið flytja úr húsnæðinu með eigur sínar.

Guðrún Ágústa Guðmundsdóttir, bæjarstjóri Hafnarfjarðar, segir að bærinn bjóðist enn til að hýsa safnið því að kostnaðarlausu en það sé húsinu til heilla að frekari starfsemi fari fram í húsinu. Guðrún telur að hægt sé að komast að farsælli niðurstöðu um málið.