Vilja skapa börnum bestu mögulegu þroskaskilyrði

„Það er svo margt sem foreldrar geta gert og þurfa að standa saman“ segir Kristín Rós Hlynsdóttir, eigandi ABC leikfanga, um læsi og lesskilning barna.

Þriðjudaginn 18. mars standa ABC leikföng fyrir fræðslufundi um læsi og lesskilning barna í leik- og grunnskólum.

Á fræðslufundinum verður rætt um niðurstöðu PISA-könnunarinnar, hvernig foreldrar og kennarar skapa börnum bestu mögulegu þroskaskilyrði er varðar lestur, tal og stærðfræði í skólum.  Þá verður blandað saman fræðslu frá fagfólki úr skólakerfinu, sérfræðingum og þeim sem vinna með vörur sem geta komið að gagni við læsi og lesskilning.

„Ég stofnaði ABC leikföng fyrir fjórum árum. Ég á sjálf barn með sérþarfir og þurfti að bíða í tvö ár eftir greiningu og aðstoð frá sérfræðingi. Þessi tími er svo dýrmætur í lífi barnsins og fór ég því að lesa mér til á netinu og hóf innflutning á þessum vörum.“

Einnig verður fjallað um framtíð lesblindra á Íslandi, kennslu gegnum leik og hreyfingu, nýjungar á markaðnum og möguleika fyrir öll börn.

ABC leikföng hafa sérhæft sig í sérkennslu og kennslugögnum og kennslutengdu efni fyrir öll börn. Kristín segir þetta hafi borið gríðarlega góðan árangur og eru skólar farnir að versla við þau í auknum mæli.

Hægt er að skrá sig á fundinn með því að senda póst á netfangið skraning@abcleikfong.is