Skammsýni að sameinast ekki HÍ

Landbúnaðarháskólinn á Hvanneyri (LBHI) verður af innviðafjárfestingu upp á tæpar 300 milljónir króna næstu tvö ár sem ráðgerð var í tengslum við sameiningu skólans við Háskóla Íslands (HÍ).

Skólanum er í staðinn gert að hefja þegar endurgreiðslu á ríflega 760 milljóna króna framúrkeyrslu fjárlaga síðustu ár. Aðstandendur skólans hafa bent á að á móti framúrkeyrslunni komi eignir í hluta- og skuldabréfum upp á um um 300 milljónir króna.

Heimildir blaðsins herma að skólanum verði gert að standa þegar skil á þeim fjármunum í ríkissjóð og síðan eigi að semja um hvernig staðið verði að endurgreiðslu þess sem út af stendur.

Fyrirhuguð sameining LBHÍ og HÍ mætti andstöðu hjá stórum hluta aðstandenda skólans, sveitarstjórn í Borgarfirði og Bændasamtökum Íslands, auk þingmanna Norðvesturkjördæmis. 

Sjálfstæði skólans var talið vega þyngra en mögulegur ávinningur af sameiningu. Fram kom í fréttamiðlinum Skessuhorni í gær að Ágúst Sigurðsson, rektor LBHI, hafi fyrir helgi sent starfsólki og nemendum tilkynningu um að ekki yrði af sameiningunni. Niðurstaðan sé honum vonbrigði og ljóst að skólinn þurfi ap draga saman seglin.

Illugi Gunnarsson menntamálaráðherra segir niðurstöðuna ekki hafa áhrif á áform um sameiningu annarra háskóla. Hann hafi hins vegar haft metnað til þess að styrkja kennslu og vísindastarf á Hvanneyri með sameiningu við HÍ. 

Samlegðaráhrif í rannsóknum og kennslu hefðu orðið mikil, auk þess sem komi hefði átt á fót nýrri stofnun í matvælarannsóknum undir forystu skólans og í samstarfi við Matís. 

„En hér tel ég að hafi því miður orðið ofan á sjónarmið sem ég tel skammsýn og hvorki til þess fallin að styrkja héraðið né nám og vísindastarfsemi í búvísindum,“ segir Illugi. 

Þó sé ekki ekki skynsamlegt að „ganga yfir heimamenn þannig að stórsjái á“ og knýja fram sameiningu. 

Illugi segir tvo kosti hafa verið uppi, annars vegar sameiningu og hins vegar að skólinn lagi sig að þeim ramma sem honum hafi verið settur í fjárlögum. 

„Ég get ekki sett meiri tíma í þetta verkefni vegna þess að liðið er á árið og við þurfum að halda okkur innan fjárlaga þessa árs. Því þarf skólinn að gríp til nauðsynlegra aðgerða til að ná fram þeirri hagræðingu sem honum er ætlað,“ segir Illugi. 

Skipuleggja þurfi námsframboð og aðra þætti fyrir næsta haust þannig að fast land sé undir fótum varðandi starfsemi skólans. 

Þá hafi hann kallað eftir því við rektor á Hvanneyri að útfærst verði mjög hratt hvernig skólinn standi skil á þeim fjármunum sem hann hafi fengið umfram fjárheimildir síðustu ár. „Skilaboð fjárlaganefndar eru mjög skýr í þeim efnum.“

Málefni skólans voru rædd í óundirbúnum fyrirspurnartíma á Alþingi í gær, en þá spurði Brynhildur Pétursdóttir, þingmaður Bjartrar framtíðar, menntamálaráðherra út í málefni skólans.