Fær að leika sér með stóru krökkunum

„Ég skildi ekkert af hverju framleiðendur þáttanna voru alltaf að hringja í mig eldsnemma í morgun og skellti bara á enda sofandi. Svo loksins þegar ég vaknaði fór ég á Twitter og þar var allt stútfullt af skilaboðum,“ segir tónlistarmaðurinn Ólafur Arnalds glaður í bragði.

Hann er tilnefndur til bresku Bafta-verðlaunanna fyrir tónlistina í sjónvarpsþáttunum Broadchurch, en verðlaunin eru á vegum bresku kvikmynda- og sjónvarpsakademíunnar.

Ólafur sá um alla tónlistina í þáttunum en hann samdi um 4 klukkustundir af efni. Þetta er frumraun tónlistarmannsins í að semja fyrir sjónvarpsþætti.

„Það er óvenjulega mikið af tónlist í þessum þáttum. Þetta var mjög skemmtilegt enda fékk ég algjört listrænt frelsi til að gera það sem mig langaði til. Það var afslöppuð stemning í kringum þættina og ég held að það sé lykillinn að velgengni þeirra.“

Ólafur hefur tekið að sér að sjá um tónlistina í framhaldsþáttunum, Broadchurch 2, sem byrjað er að framleiða, en sú vinna hefst næsta haust.

„Þessi tilnefning opnar einhverjar dyr fyrir mig og nú getur maður farið að leika sér með stóru krökkunum. Þættirnir hafa líka verið mjög vinsælir, sýndir í hátt í 100 löndum, svo ég hef fengið mikið af tilboðum í kjölfarið á þeim vinsældum,“ segir Ólafur sem stefnir á rauða dregilinn við verðlaunaafhendinguna í London 28. apríl.

„Ég held ég hafi ekkert val. Þetta er eins og með Óskarinn, sértu tilnefndur til Bafta mætirðu á svæðið. Ég er byrjaður að taka við umsóknum um hver fær að koma með mér. Búa til smá samkeppni.“

Tónlistarmaðurinn hefur verið á miklu flakki um heiminn undanfarið og eru næstu tónleikar hans í Varsjá í Póllandi þann 4. apríl á Electronics Festival.

„Ég verð á einhverju flakki milli hátíða í sumar, það er allt að skýrast núna. Svo það er nóg að gera og mikið spennandi fram undan.“

Vinsælir sjónvarpsþættir



Spennuþættirnir Broadchurch hafa átt mikilli velgengni að fagna úti um allan heim.

Þeir voru fyrst sýndir í Bretlandi í mars í fyrra og horfðu þá rúmlega 6 milljón manns á fyrsta þáttinn. Þeir eru tilnefndir til fimm Bafta-verðlauna auk tónlistarverðlaunanna. Meðal annars fyrir bestu leikstjórn og besta handritið.



Með aðalhlutverk fara David Tennant og Olivia Colman. 



Byrjað er að framleiða aðra seríu og sér Ólafur einnig um tónlistina þar. Þá er hafin framleiðsla á bandarískri útgáfu af þáttunum sem fer í loftið næsta vetur og nefnist Gracepoint.

So I guess my press releases will read "The BAFTA nominated composer" from now on.... :) http://t.co/KJWJQjHYRH

— Ólafur Arnalds (@OlafurArnalds) March 24, 2014