Krabbamein afgreitt á svipaðan hátt og Facebook-leikir

„Það er einhver furðuleg áskorun að ganga á Facebook sem gengur út á að með því að konur birti myndir af sér ómáluðum séu þær að sýna stuðning við baráttu gegn brjóstakrabbameini,“ segir Berglind Guðmundsdóttir.

Berglind er sjálf með brjóstakrabbamein og skrifaði opinn pistil á Facebook-síðu sína í gærkvöldi. Pistillinn hefur vakið talsverða athygli.

Berglind hefur staðið í baráttunni við sjúkdóminn í sex ár.

„Maður veltir því fyrir sér hvernig í ósköpunum þessar myndbirtingar eigi að koma að gagni í baráttunni gegn krabbameini,“ segir Berglind.

„Eflaust er þetta fallega hugsað en þetta er samt eitthvað svo yfirborðskennt og meira til þess fallið að sníkja komment um hversu vel viðkomandi líti út án þess að það komi brjóstakrabbameini nokkuð við,“ segir Berglind.

Milljónir safnast í Bretlandi

Upphaf þessarar áskorunar má rekja til þess að bandaríski glæpasagnahöfundurinn Laura Lippman birti mynd af sér ómálaðri á Twitter. Það gerði hún til stuðnings Kim Novak, 81 árs gamalli leikkonu, en útlit hennar var talsvert gagnrýnt þegar hún kom fram á Óskarsverðlaunahátíðinni á dögunum. Uppátæki Lippman vakti mikla athygli og fleiri konur birtu myndir af sér án farða í kjölfarið.

Í Bretlandi var svo skorað á þúsundir kvenna að birta slíkar myndir af sér í þeim tilgangi að styðja við krabbameinsfélagið þar í landi. Áskorunin eða herferðin gengur undir nafninu #nomakeupselfies. Á fyrstu tveimur dögum herferðarinnar safnaðist jafnvirði tæplega 400 milljóna íslenskra króna. Söfnunin gengur þannig fyrir sig að vinir þeirra sem birta slíkar myndir senda sms-skilaboð í ákveðið númer og styrkja þannig samtökin.

Krabbameinsfélagið í Bretlandi stendur ekki fyrir herferðinni en frá því að hún hófst hafa peningarnir flætt inn til félagsins.

Enginn peningur safnast hér á landi

Frá Krabbameinsfélagi Íslands fengust þær upplýsingar að enginn hefði haft samband við félagið vegna áskorunarinnar né hefðu neinir peningar safnast. Hér á landi virðist því sem birting ómálaðra sjálfsmynda sé frekar til almenns stuðnings en fjárhagslegs.

Bendir fólki á að senda frekar persónulega kveðju

Berglind segir áskorunina minna sig á færslur sem hafa verið vinsælar á Facebook og eiga að lýsa yfir stuðningi við þá sem eru með sjúkdóminn. „Þegar maður sér sama textann afritaðan mörgum sinnum sama daginn, þá missir hann marks.“

Sjálfsmyndaáskorunin og krabbameinsfærslurnar fari að minna á „like“-leikina sem iðulega eru í gangi á Facebook. Krabbamein sé afgreitt á svipaðan hátt. Það þurfi bara að taka þátt, deila færslu og fá nokkur „like“ og svo sé þetta búið.

Berglind segist ekki ein um þessa skoðun. Upplifun annarra krabbameinssjúklinga sem hún hafi rætt við séu á sömu leið.

Hún bendir þeim á sem raunverulega vilja sýna stuðning við baráttuna að styrkja þau samtök sem vinni með krabbameinsveikum. Þeir sem hafi ákveðinn krabbameinssjúkling í huga mættu líka frekar senda viðkomandi persónuleg hvatningarorð og spyrja út í líðan. Viðkomandi eigi eftir að þykja mun vænna um það en einhverja „keðju-færslu“.

„Það er flott hvernig áskorunin byrjaði en það hefur ekki skilað sér hingað til lands. Hér snýst þetta um að setja inn mynd af sjálfum sér og fá „like“,“ segir Berglind sem vonar til þess að það sem hún hafi um málið að segja veki fólk til umhugsunar og styrki til dæmis krabbameinsfélagið eða önnur góð málefni.

Post by Berglind Guðmundsdóttir.