Lamaður kvikmyndagerðarmaður tók upp heimildarmynd í óbyggðum

Tveggja og hálfs árs vinnu Péturs Guðmundssonar kvikmyndagerðarmanns að heimildarmyndinni Heild er nú lokið, þremur árum eftir að hann lamaðist í slysi í Austurríki. Pétur lét lömunina ekki stöðva sig og reif sig upp og byrjaði að vinna að myndinni, sem gerist að stórum hluta í óbyggðum landsins.

Pétur vann myndina nánast alla sjálfur. „Það var bölvað vesen að ferðast um landslag sem var erfitt yfirferðar en ég náði því nú samt. Ég giska á að ég hafi unnið um áttatíu til níutíu prósent af myndinni sjálfur.

Til dæmis keyrði ég um fimmtíu þúsund kílómetra um landið allt til að taka upp,“ útskýrir Pétur. Hann vonast til þess að geta notað ágóðann af myndinni til þess að fjármagna aðgerðir á sjálfum sér erlendis. Hann er ósáttur við þau úrræði sem lamaðir standa frammi fyrir á Íslandi og vonast til þess að geta breytt því með baráttu sinni. „Þetta er óásættanlegt vandamál, öll endurhæfing gengur út á að kenna fólki á hjólastól.

Í staðinn fyrir að endurvekja mænuna er hún sett í líkkistu. Erlendis er verið að þróa aðferðir og ég er tilbúinn að verða tilraunadýr. Ég vil leggja mitt lóð á vogarskálarnar, svo þeir sem slasist þurfi ekki að vera fastir við hjólastól um alla ævi.“

Pétur fjármagnaði myndina algjörlega sjálfur. „Þetta er allt úr mínum eigin vasa. En ég gat lækkað kostnaðinn með því að gera nánast allt sjálfur. Ég held að ég hafi borgað einum starfsmanni laun.“ Myndin er sérstök að því leyti að í henni er nánast ekkert talað. „Í myndinni heyrist ein setning og hún er í gegnum talstöð. Þetta er fyrsta heimildarmyndin um Ísland sem er án sögumanns. Tungumálið í myndinni er landslagið, náttúran og mannlífið,“ segir Pétur.

Henni er skipt upp í fjóra hluta, eftir árstíðum. „Ég notast mikið við tímahleypu, sem er kvikmyndatækni sem byggir á því að taka stillimyndir og sýna þær á ákveðnum hraða. Ég sýni allar árstíðir í röð sem birtast á þremur dögum og þremur nóttum. Við tókum upp næturlífið í Reykjavík, snjóbretta- og brimbrettasenur og margt fleira. En náttúran er í aðalhlutverki, ég reyni að gera þessari mögnuðu eyju, sem Ísland er, góð skil,“ segir Pétur.

Pétur á nú í viðræðum við kvikmyndahús um að sýna myndina og vonast til þess að geta sýnt hana erlendis líka. „Þessa mynd skilja allir, þetta er frábær landkynning, sýnir fegurð landsins.“