14 ára telpa vann hetjudáð í Írabakka

Kona liggur þungt haldin á gjörgæsludeild Landspítalans í Fossvogi eftir að eldur kom upp í íbúð í Breiðholti í nótt. 14 ára telpa vann hetjudáð þegar hún bjargaði móður sinni út úr brennandi íbúð. Kraftaverk segir nágranni.

Tilkynnt var um eld í fjölbýlishúsi í Írabakka rétt fyrir klukkan fimm í nótt. Það tók slökkvilið aðeins um fjórar mínútur að komast á staðinn en fjölmennt slökkvilið hafði fyrr um nóttina sinnt útkalli í matvöruverslun í Breiðholti skammt frá.

Móðirin liggur þungt haldin á gjörgæsludeild Landspítalans í Fossvogi að sögn vaktlæknis. Henni er haldið sofandi eftir að hafa hlotið reykeitrun og alvarleg brunasár. Dóttirin var flutt á sjúkrahús með reykeitrun og sömuleiðis kona úr næstu íbúð. Þær hafa verið útskrifaðar af gjörgæsludeild.

Telpan óð í gegnum eldhaf

Dóttirin kom móður sinni til bjargar með því að aðstoða hana við að komast út úr íbúðinni. Nágranni segir að telpan hafi ætt í gegnum eldhaf til að bjarga móður sinni.

„Við vöknuðum við hróp og köll - hróp á hjálp,“ segir Ólafur Snævar Ögmundsson, íbúi í Írabakka 30. „Við næstu dyr á stigaganginum, þar liggur kona í dyragættinni og hrópar á hjálp. Hún hrópaði einnig nafn dóttur sinnar sem var einhvers staðar í eldhafinu í íbúðinni. Ég frétti svo síðar að stúlkan hafi komist á einhvern undraverðan hátt í gegnum eldhafið og hjálpað til við að draga móður sína frá eldinum og hitanum. Ég myndi segja að það væri líkast kraftaverki að stúlkan hafi komist í gegnum eldhafið.“

Eldsupptök eru ókunn að sögn lögreglu. Enginn virkur reykskynjari var í íbúðinni. Fulltrúar Rauða krossins voru kallaðir út og veittu íbúum í Írabakka 30 áfallahjálp. Litlu mátti muna að illa færi.

„Það hefði ekki mátt bíða mikið lengur því þá hefði eldurinn jafnvel náð út á gang. Það eru allir íbúar í hættu þegar svona gerist,“ sagði Þórir Steinarsson, varðstjóri slökkviliðsins á höfuðborgarsvæðinu.