Sjúklingar í gluggalausum kompum og á öllum göngum spítalans

„Það sem við eigum við er að það er búið að ganga svo nærri Landspítalanum að við upplifum að það sé að verða ekkert eftir hérna," segir Anna Gunnarsdóttir barnaskurðlæknir og formaður Læknaráðs LSH um áskorun sem fjölmennur fundur ráðsins sendi stjórnvöldum um að „hætta við áform sín um að taka af lífi Landspítala og heilbrigðiskerfi Íslands á hægan og kvalafullan hátt".

„Þetta er örvæntingarfull ósk okkar um að heilbrigðiskerfið verði sett í forgang," segir Anna, en að hennar sögn er ástandið búið að vera sérstaklega erfitt undanfarið þar sem mikið hefur verið um inflúensur og sýkingar. „Við erum búin að þurfa að hola niður sjúklingum í gluggalausum kompum og á göngum alls staðar um spítalann."

Anna segir stjórnvöld hafa gengið allt of langt í niðurskurði til heilbrigðiskerfisins og segir að Læknaráðið auglýsi eftir úrræðum til að takast á við þennan mikla vanda.

Líka skorið niður á uppgangstímum

„Það er búið að skera niður um næstum 25 prósent og fækka starfsfólki heilmikið. Einnig hefur orðið mikil fækkun á sjúkrarúmum. Það var líka verið að skera niður hér á uppgangstímum þannig að niðursveiflan lendir ansi hart á okkur."

Anna var einn af frummælendum fundsins, auk Pálma V. Jónssonar öldrunarlæknis, en Anna segir mál aldraðra innan heilbrigðiskerfisins gríðarlega stórt. „Öldruðum fjölgar á Íslandi og það er virkilega jákvæð þróun. Hins vegar þurfum við að vera tilbúin að taka á móti þeim. Það vantar bæði hjúkrunarpláss og sjúkrarými, en aldraðir verða enn meira veikir en þeir yngri."

Anna segir lækna þurfa að láta vita þegar gengið er of nærri starfseminni þannig að ekki náist að sinna öllum. Engir aðrir berjist fyrir sjúklinga og því hljóti læknar að vera talsmenn þeirra.

„Það eru kosningar í nánd og það er sorglegt að lesa í blöðunum stór viðtöl við formenn flokkana en hvergi er minnst á heilbrigðismál, sem samt eru stærsti útgjaldaliður ríkisins."