Írar spenntir fyrir ungum íslenskum kvikmyndagerðamanni

Ungur íslenskur drengur hefur vakið athygli í írskum fjölmiðlum fyrir myndband sem hann tók og klippti af ofurhugum í íslenskri náttúru. Ofurhugarnir eru vinir hans og þeir taka heljarstökk framan af klettatoppum og höfnum ofan í ísköld íslensk vötn og sjó.

„Það var haft samband við mig frá fyrirtæki á Írlandi eftir að ég setti þetta myndband á Youtube,“ útskýrir Kristinn Gauti Gunnarsson, kvikmyndagerðamaðurinn, en hann er 18 ára og býr á Akranesi. Því er myndbandið að stórum hluta tekið í nágrenni við Akranes. „Fyrirtækið tekur svona myndbönd og deilir þeim áfram á fréttavefi.“ Hann segir fyrirtækið því í raun vera hálfgerður umboðsaðili fyrir sig. „Þeir eru milliliður og taka prósentu af því sem að ég fæ.“ Myndbandið birtist í myndbandafréttahluta vefsíðunnar BelfastTelegraph.

Hann segir hugsunina á bakvið myndbandið ekki snúa að því að auka ferðamannaflauminn til landsins. „En þetta er náttúrulega íslenskt og kannski öðruvísi að horfa á þetta fyrir erlenda einstaklinga.“

Kristinn hefur, þrátt fyrir ungan aldur, verið að vesenast í kvikmyndagerð í nokkur ár. „Það hefur verið meira í sumar heldur en áður. Ég hef verið að vinna með Dúa Landmark við að taka upp þætti sem sýndir verða á RÚV í vetur.“

Aðspurður að því hvort hann stefni á samstarf við fleiri aðila þá segir hann það verða að koma í ljós í framtíðinni.

Myndbandið má sjá hér að ofan.