Er vön að framkvæma hugmyndir mínar strax

„Áhuginn á barnavörum kviknaði þegar ég var ólétt af dóttur minni en mér fannst svo lítið úrval af vörum og margt svo óspennandi hér á landi miðað við það sem ég þekki frá Svíþjóð,“ segir Linnea Ahle sem að opnar vefverslunina Petit.is á mánudag.

Linnea flutti til Íslands fyrir rúmlega tveimur árum en hún kynntist eiginmanni sínum, Gunnari Þór Gunnarssyni fótboltakappa fyrir í Svíþjóð þegar hann var atvinnumaður í fótbolta.

Eftir meiðsli sótti hugur hans heim og ákvað parið því að setjast að á Íslandi. Fljótlega eignuðust þau dótturina Þóru sem er innblástur verslunarinnar.

Verslunin verður eingöngu á netinu til að byrja með en þannig segist Linnea geta haldið verðinu lægra en gengur og gerist.

„Sum merkin eru á svipuðu verði og H&M því ég vil að allir geti verslað á petit.is,“ útskýrir Linnea.

Vöruúrvalið inniheldur sænsk vörumerki á borð við Mini Empire, Petter & Kajsa, OMM design og Färg & Form Sweden sem er skemmtileg lína með skýjum á sængurfötum, fatnaði og fleiru. 

Í Svíþjóð starfaði Linnea meðal annars í sjónvarpi við framleiðslu og tók þátt við gerð sænsku Idol þáttanna árið 2011. 

„Ég er vön að framkvæma hugmyndir mínar strax og ákvað því að nota tengslanetið mitt úti til að koma versluninni á laggirnar sem hefur gengið vonum framar,“ segir hún.