Eini kvendómarinn skilar enn og aftur séráliti í kynferðisbrotamáli

Ingibjörg Benediktsdóttir, hæstaréttardómari, skilaði séráliti í sýknudómi Hæstaréttar yfir Ómari Traustasyni í dag.

Í sérálitinu taldi Ingibjörg að framburður fórnarlambsins hefði verið skýr og greinargóður, enginn misbrestur á honum og héraðsdómur hefði metið hann trúverðugan. Stoð hafi fengist fyrir framburði drengsins í vitnisburði prófessors og sálfræðings drengsins fyrir dómi og jafnframt vitnisburði hans og bréfi fyrir barnaverndarnefnd Reykjavíkur þar sem hann skýrði frá því að hann hefði verið misnotaður kynferðislega af Ómari.

Ingibjörg segir ennfremur í sérákvæði sínu að engin ástæða sé til að draga mat héraðsdóms á trúverðugleika drengsins í efa. Þá skuli líta til þess að brotaþoli hafi aðeins verið 14 til 15 ára þegar á honum var brotið og því eðlilegt að hann legði ekki fram kæri fyrr en hann hafði aldur og þroska til þess. Ekki skuli meta honum það í óhag að hafa ekki lagt fram kæru á hendur ákærða fyrr en raun varð á.

Ingibjörg telur að með vísan til þess sem fram kemur í sérákvæðinu og forsendna héraðsdóms skuli staðfesta niðurstöðu um sakfellingur Ómars.

Ingibjörg Benediktsdóttir hefur tvisvar áður á þessu ári skilað ein sérákvæði í nauðgunarmálum.

Annars vegar í máli þar sem fjórir hæstaréttardómara sýknuðu Andreu Unnarsdóttur, Jón Ólafsson, Elías Valdimar Jónsson af ákæru um kynferðisbrot þar sem fingrum var stungið upp í endaþarm og leggöng brotaþola sem hluti af grófri líkamsárás sem brotaþoli var beittur en sakfelldu þau þess í stað fyrir meiriháttar líkamsárás.

Þar taldi Ingibjörg að sakfella ætti fyrir kynferðisbrot með þeim rökum að hugtakið „önnur kynferðismök“ væri skýrt í lögskýringargögnum og undir það teldist meðal annars falla sú háttsemi að setja fingur eða hluti í leggöng eða endaþarm.

Þá skilaði Ingibjörg hins vegar sérákvæði í máli Stefáns Loga Sívarssonar og Þorsteins Birgissonar, þar sem héraðsdómur hafði dæmt þá í 5 ára og 4,5 árs fangelsi fyrir að hafa nauðgan tæplega 19 ára stúlku. Í sérákvæði hennar í því máli taldi hún það hafið yfir allan vafa að mennirnir tveir hafi gerst sekir um það brot sem þeir voru ákærðir fyrir og því beri að staðfesta niðurstöðu héraðsdóms um sakfellingu þeirra.

Fjórir dómarar við Hæstarétt töldu hins vegar að í skýrslum stúlkunnar hjá lögreglu og fyrir dómi hefði gætt verulegs misræmis um ýmis mikilvæg atriði og „að um önnur slík atriði hefði framburður hennar stangast á við sýnileg sönnunrgögn,“ eins og segir í dómi Hæstaréttar.

Í öllum þessum þremur málum var Ingibjörg eina konan í hópi þeirra hæstaréttardómara sem dæmdu í málunum.