"Við fáum alltaf borgað"

„Tímabilið hefur gengið nokkuð vel. Við vildum auðvitað vera nær KR-ingum en þeir hafa verið í fantaformi. Nú eigum við þrjá leiki sem við stefnum á að vinna til að komast í toppbaráttuna aftur,“ segir Skotinn Iain James Williamson, leikmaður Vals.

Valur tekur á móti nýliðum Víkings frá Ólafsvík í 11. umferð Pepsi-deildar karla í knattspyrnu í kvöld. Valur situr í 5. sæti en ætlar sér ofar.

„Við trúum því að við getum hafnað í öðru eða þriðja sætinu. Það getur vel gerst en hafa verður í huga að fimm efstu liðin geta hvert unnið annað,“ segir Williamson.

Skotinn meiddist á hné í síðasta leik Valsmanna gegn FH og missir af öllum líkindum af leik kvöldsins. Hann reiknar þó með því að vera klár í slaginn á sunnudaginn gegn FH. Williamson, sem spilaði með Grindavík í fyrra, ber landsbyggðinni vel söguna þrátt fyrir að vera borgarbarn.

„Hjá Grindavík bjuggum við útlendingarnir saman en hérna bý ég einn. Ég er vanari borgarlífinu í Skotlandi og þar er meira um að vera.“ Skotinn hefur komið við sögu í tíu leikjum Vals í sumar en á enn eftir að skora.

Menningarmunur á löndunum

„Ég held að markið sé handan við hornið. Ég spila reyndar aðeins aftar á vellinum en ég hef gert stærstan hluta ferilsins. Mér hefur þó tekist að leggja upp nokkur mörk og það er kannski frekar hlutverk mitt núna.“

Fæstir Reykvíkingar bera sumrinu vel söguna en Williamson kippir sér lítið upp við sólarleysið.

„Ég er vanur því að verða fyrir vonbrigðum með veðrið enda frá Skotlandi. Það er kannski aðeins hlýrra heima, við fáum a.m.k. nokkra mjög hlýja daga, en veðrið angrar mig ekki,“ segir Skotinn. Það sama verður ekki sagt um foreldra hans sem komu í heimsókn á dögunum.

„Þau trúðu því ekki hve kalt var hérna,“ segir Williamson.

Orðrómur hefur verið um að leikmenn í efstu deild eigi margir hverjir í erfiðleikum með að fá laun sín greidd. Williamson segist ánægður hjá Val og segist ekki hafa lent í vandræðum hvað þetta viðkvæma mál snertir.

„Það er menningarmunur á Skotlandi og hér hvað þetta varðar. Ég hef hins vegar ekki yfir neinu að kvarta. Við fáum alltaf borgað.“

Leikur Vals og Víkings hefst á Vodafone-vellinum klukkan 19.15. Á sama tíma verður flautað til leiks á Skaganum þar sem Fylkir verður í heimsókn.