Vill beita matvælaframleiðendur háum fjársektum

„Það var engin vara í samræmi við innihaldslýsingu, og það eitt og sér, er grafalvarlegt mál," segir Jóhannes Gunnarsson, formaður Neytendasamtakanna, um niðurstöður sýnatöku matvælastofnunar þar sem sextán matvörutegundir voru rannsakaðar.

Í tveimur tilvikum kom í ljós að nautakjöt var ekki í vörunni eins og innihaldslýsingin sagði til um. En engin vara uppfyllti allar kröfur um merkingar, samkvæmt niðurstöðu matvælastofnunar.

„Það að það vanti nautakjöt í vöruna eru náttúrulega hrein og klár vörusvik," segir Jóhannes og segir að neytendur hljóti að gera kröfu um að það verði tekið hart á svona löguðu. „Að mínu mati kallar þetta á að frekari sýnatökur, sérstaklega þegar niðurstöðurnar eru svona lélegar," bætir Jóhannes við.

Hann segir það ekki síður alvarlegt að fyrirtæki merki vörur með vitlausum hætti. Raunar segir Jóhannes slík vinnubrögð með öllu óþolandi. „Það þarf að hafa í huga að í samsettum vörum eru oft hráefni notuð sem ákveðinn hluti neytenda er með óþol eða ofnæmi fyrir. Það er því grafalvarlegt mál fyrir þennan hóp að geta ekki treyst innihaldslýsingum."

Jóhannes bendir á að innlendir framleiðendur hafi hingað til stært sig af því að framleiðsla á matvælum hér á landi sé í góðu standi. Jóhannes segir ljóst að svo sé ekki.

„Ég segi það, því miður, að staðreyndin er sú, að það sem heldur aðilum best við efnið, framleiðendum það er að segja, er að þeir geti búist við verulegum sektum gerist þeir brotlegir við merkingar á innihaldi," segir Jóhannes sem vill að löggjafarvaldið herði reglur og lög verulega til hagsbóta fyrir neytendur.

„Þetta ástand er allavega óþolandi og þarf að koma þessu í lag," segir Jóhannes að lokum.