Innanríkisráðherra undirbýr millidómstig

Hanna Birna Kristjánsdóttir innanríkisráðherra hefur skipað nefnd til að undirbúa millidómstig.

Í tilkynningu ráðherra segir að meðal markmiða í stefnuyfirlýsingu ríkisstjórnarinnar sé að tekið verði upp millidómstig bæði í einkamálum og sakamálum og að Hæstiréttur starfi í einni deild.

Með skipun nefndarinnar sé ráðherra að hrinda þessu verkefni af stað. Nefndin muni útfæra  fyrirkomulag, tímamörk, kostnað og önnur atriði sem snerta tilurð millidómstigs með drögum að frumvarpi.

Í frumvarpinu verði fjallað um starfsemi og fyrirkomulag sameiginlegrar stjórnsýslu dómstóla landsins og eftirlit dómskerfisins með dómurum og starfsemi dómstóla.

Stefnt sé að því að leggja megi frumvarp fyrir Alþingi í mars á næsta ári.

Formaður nefndarinnar er Kristín Edwald hæstaréttarlögmaður og aðrir nefndarmenn eru Hafsteinn Þór Hauksson, lektor við HÍ, og Hervör Þorvaldsdóttir héraðsdómari.