Segir hugmyndir Hrefnuveiðimanna vera auglýsingatrikk

Skiptar skoðanir eru á hugmyndum Hrefnuveiðimann um veiðar á hnúfubak í vísindaskyni. Stefán Guðmundsson, framkvæmdastjóri hvalaskoðunarfyrirtækisins Gentle Giants á Húsavík segir að þeir muni verja hnúfubakinn með ýmsum hætti komi til þeirra.

„Reyndar trúi ég ekki öðru en menn séu að grínast með þessum bollaleggingum, það er sumar og gáski í mönnum," segir Stefán. „En ef svo er ekki þá munum við verja hnúfubakinn með kjafti og klóm. Það er mjög auðvelt að torvelda slíkar veiðar og við munum grípa til slíkra aðgerða ef á reynir. Kannski þurfum við ekkert að gera því þrýstingurinn yrði svo mikill erlendis frá að það myndi aldrei fást friður til þessara veiða."

Loðnusjómenn segja hinsvegar löngu tímabært að veiða og rannsaka hnúfubakinn sem hafi fjölgað gríðarlega síðustu ár. Árni Finnsson, formaður Náttúruverndarsamtaka Íslands, segist hinsvegar ekki taka þessu tali Hrefnuveiðimanna alvarlega. „Þeir nota svona yfirlýsingar til að auglýsa hrefnukjötið, það hefur verið svo dræm salan hjá þeim í sumar," segir hann.

Skipsstjórar á uppsjávarskipum sem Fréttablaðið ræddi við eru hinsvegar á því að það sé tímabært að veiða og rannsaka hnúfubakinn sem hafi fjölgað gríðarlega síðustu ár. „Það er svo gríðarlega mikið af þessari skepnu að það getur verið alveg hrikalegt að koma nótinni út," segir Arnþór Hjörleifsson skipsstjóri á Lundey NS. Reyndar hafa flest loðnuskip brugðist við þessu með því að setja svokallaðan hvalafæli á nætur sínar til þess að getað kastað án þess að flækja hnúfubakinn í þeim. „Það væri nú ómaksins virði að vita hvað þetta er að éta," bætir hann við og segir að ekki sæi högg á vatni þó nokkrar væru teknar. Skipsstjórar á Huginn og Aðalsteini Jónssyni voru sama sinnis.

Sigursteinn Másson, talsmaður Alþjóðadýraverndunarsjóðsins, segir að hugmyndir um þessar veiðar séu allsendis óraunhæfar. „Það væri gegn öllum samþykktum Alþjóðahvalveiðiráðsins," segir hann. „Svo er þarna verið að fara fram á ríkisstyrktarveiðar og ég held að nú þegar verið er að skera niður hjá ríkinu þá sé ekki hljómgrunnur fyrir því að setja peninga í svona til að stafla nýjum stöflum í hvalkjötfjallið sem er fast á landinu."