„Egill skapaði sjálfur skrípið“

Lögmaður Sunnu Ben Guðrúnardóttir segir að Egill Einarsson hafi sjálfur skapað sér þá orðræðu sem hann nú stefnir umbjóðenda sínum fyrir. Aðalmálsmeðferð í meiðyrðamáli Egils gegn Sunnu Ben fór fram í morgun í Héraðsdómi Reykjavíkur. Sunna skrifaði færslu á Facebook þar sem hún sagði Egil hafa nauðgað unglingsstúlku.

Egill gaf skýrslu í morgun þar sem hann sagðist ekki ætla að sætta sig við það að vera kallaður nauðgari. Nauðgunarkæra á hendur Agli og unnustu hans, Guðríði Jónsdóttur, var látin niður falla. Egill kom í kjölfarið í viðtal í Monitor, fylgiriti Morgunblaðsins. Það viðtal fór fyrir brjóstið á mörgum og var stofnaður hópur á Facebook þar sem viðtalinu var mótmælt.

Hörð orð voru látin falla á vegg hópsins, meðal annars af Sunnu Ben, sem Egill kærði í kjölfarið fyrir meiðyrði. Sigríður Rut Júlíusdóttir, lögmaður Sunnu, telur að umbjóðandi sinn hafi ekki brotið af sér þar sem Egill hafi sjálfur skapað þá orðræðu sem hann stefnir nú Sunnu Ben fyrir.

Hún segir að Egill hafi ítrekað skrifað með niðrandi hætti um konur og hvatt til athafna sem auðvelt sé að túlka sem nauðgun. Sigríður segir að Egill hafi sjálfur skapað þessa orðræðu, hvort sem það sé í hans eigin nafni eða einhvers „skrípis“ eins og Sigríður komst að orði og átti þar við karakterinn Gillz.

Vitnaði Sigríður þar í bloggfærslur og bækur sem Gillz hefur gefið út á síðustu árum. Sigríður segir að umbjóðandi sinn hafi ekki fundið það upp hjá sjálfri sér að skrifa um Egil á umræddri síðu á Facebook heldur hafi hún verið að taka þátt í umræðu, umræða sem Egill hafi sjálfur verið upphafsmaður á með viðtali sínu við Monitor.

Egill stefndi fjórum aðilum fyrir meiðyrði en eitt mál var látið niður falla eftir að stefndi baðst afsökunar. Egill tók þá afsökun til greina og lét málið niður falla. Verjandi Egils segir að Sunnu hafi boðist að gera slíkt hið sama. Hún afþakkaði það boð. Egill fer fer fram á að Sunna verði dæmd fyrir meiðyrði og einnig til að greiða miskabætur upp á eina milljón króna. Dómsuppskvaðning fer fram þann 21. október næstkomandi.