Reka fé af fjalli á morgun

Bændur á Norðvesturlandi eru lagðir af stað til fjalla til að smala fé sínu. Þar og á Norðausturlandi ætla menn að sækja fé á afréttum á næstu tveimur til þremur dögum vegna óveðurspár fyrir Norðurland á föstudag og laugardag. Á Norðausturlandi eru menn með varann á vegna óveðursspárinnar enda brenndir af því þegar um tíu þúsund fjár urðu úti í miklum veðurofsa í september í fyrra. Spáin er þó heldur að skána fyrir Norðausturland.

Veðurstofan spáir norðanhvelli á Norðurlandi á föstudag og laugardag með töluverðri úrkomu, slagviðri í byggð en snjókomu til fjalla. Þúsundir fjár er enn á fjalli enda áttu göngur ekki að hefjast fyrr en um miðjan næsta mánuð.

Nú gerir veðurspáin ráð fyrir versta veðrinu á Norðvesturlandi og þar hafa bændur ákveðið að hefja göngur í fyrramálið. Bjarni Bragason fjallskilastjóri í vestanverðum Skagafirði, eða Staðaafrétt, segir bændur þar eiga um 10 þúsund fjár á fjalli.

„Það á að smala allt svæðið nú í vikunni. Við notum miðvikudag og fimtudag til að smala og rétta.,“ segir Bjarni. Það eigi að nást á þessum tveimur dögum. „Já, við náum því á tveimur dögum og komum fé niður í byggð,“ segir hann.

Norðaustursvæðið varð mjög illa úti í fyrra. Sæþór Gunnsteinsson gangnastjóri segir að fundað hafi verið með almannavarnadeild og sýslumanni í gærkvöldi um málið. Þótt spáin fyrir svæðið sé heldur betri í dag en í gærkvöldi reikni hann engu að síður með að menn fari af stað í göngur í fyrramálið, enda séu menn á varðbergi eftir árið í fyrra.

„Á öllu landinu er talað um að það hafi farið eitthvað í kringum tíu þúsund fjár. Á okkar heiðum fóru eitthvað í kring um eitt þúsund, þ.e.a.s. í Mývatnssveit, Reykjahverfi, Kelduhverfi og Aðaldal,“ segir Sæþór. Menn vilji ekki lenda í því aftur.

„Nei, ég held að samfélagið þoli það nú ekki að fá aftur slíkan skell. Þess vegna erum við stressaðir, það er alveg rétt, enda eigum við að vera það,“ segir Sæþór.

Sæþór segir ekkert mál að finna mannskap með svo skömmum fyrirvara. Allir séu boðnir og búnir til að hjálpa. Það taki tvo daga að smala afréttina og svo þurfi að reka féð um 18 kílómetra leið niður í dal sem taki heilan dag.

„Það sem við vorum hræddir við í gærkvöldi að föstudagurinn yrði slæmur, eins og þetta var dregið upp í gærkvöldi. En hann virðist ætla að verða þolanlegur þannig að við getum verið svolítið rólegir með hann og ættum að hafa hann til smölunar líka,“ segir Sæþór.

Nú sé versta spáin fyrir norðvestursvæðið, Húnavatnssýslu og Skagafjörð en vonandi verði veðurofsinn ekki eins slæmur og í fyrra, en allur sé varinn góður.

„Já, við erum auðvitað skaðbrenndir af árinu 2012 og viljum ekki lenda í því aftur og gerum það ekki. Við tökum enga sénsa núna,“ segir Sæþór Gunnsteinsson gangnastjóri.