Býflugur vekja ugg í sumarbústaðahverfi

Býflugnarækt sumarbústaðareigenda í Sléttuhlíð ofan Hafnarfjarðar fellur í grýttan jarðveg eigenda næstu bústaða.

Hafnarfjarðarbær heimilaði hjónunum Helga Laxdal og Katrínu Árnadóttur að koma fyrir býflugnabúum í landi bæjarins rétt hjá sumarbústaðarlóð þeirra í Sléttuhlíð. Ræktunin var leyfð í september 2011 og átti leyfið að gilda í eitt ár í tilraunaskyni.

Talsverður fjöldi sumarbústaða er í Sléttuhlíðarhverfinu. Samkvæmt upplýsingum frá Hafnarfjarðarbæ hafa borist ábendingar frá nágrönnum sem eru ósáttir við að býflugnabúin séu í almenningnum.

Umkvartanir nágrannanna voru teknar fyrir á fundi skipulags- og byggingarfulltrúa Hafnarfjarðar í síðustu viku. Ekki fæst upplýst hjá bænum hverjir það eru en samkvæmt fundargerð vilja þeir býflugurnar burt.

„Kvartað er yfir ónæði frá býflugnabúi, bæði eru menn hræddir við flugurnar og eins eru sumir með ofnæmi,“ segir í fundargerðinni. „Eiganda býflugnabúsins er gert að færa búið inn á sína eigin lóð vegna þessara ábendinga,“ er niðurstaðan.

Þótt sumarið sé enn nokkuð langt undan eru býflugurnar í Sléttuhlíð komnar á stjá og virtust una sér vel í vorsólinni í gær. Um er að ræða tvo klasa af búum sem standa á að giska þrjátíu metra frá mörkum lóðar sumarbústaðar Helga og Katrínar.

Ekki náðist í þau Helga og Katrínu við vinnslu þessarar fréttar í gær en í leyfisumsókn þeirra frá 2011 kemur fram að þau hafi áður verið með býflugnarækt við íbúðarhús sitt. Þau vilji fjölga búunum og hafa þau á svæði þar sem ekki sé úðað með skordýraeitri.

„Býflugurnar sem fluttar hafa verið hingað inn undanfarin ár eru frá Álandseyjum og eru mjög gæfar. Þær eru ekki að angra fólk nema farið sé ofan í búin þeirra. Þær fara ekki að matarborði heldur halda sig eingöngu við blómin og hafa engin óþægindi verið af þeim í garðinum hjá mér síðastliðin tvö ár,“ sagði í bréfi hjónanna sem jafnframt undirstrikuðu mikilvægi býflugna fyrir líffræðilegan fjölbreytileika: „Gera má ráð fyrir að gróðurinn í Sléttuhlíðinni muni auðgast verulega með veru býflugnanna þar.“