Sex hundruð milljóna verkefni og 20 störf í óvissu vegna IPA styrkja

Náttúrufræðistofnun Íslands er með stærsta verkefnið sem styrkt hefur verið með IPA styrkjum Evrópusambandsins, upp á samtals 3,6 milljónir evra eða um 583 milljónir íslenskra króna. Jón Gunnar Ottósson forstjóri Náttúrufræðistofnunar segir að Evrópusambandið hafi komið að verkefninu í júlí í fyrra og því eigi að ljúka í júní 2015. En hvað er verið að gera fyrir þetta fé?

„Í stuttu máli má segja að við séum að kortleggja náttúru Íslands upp á nýtt með nýjum aðferðum. Þá erum að við að tala um alla náttúru landsins nema hafið. Við erum að kortleggja fjörur, land, stöðuvötn, straumvötn og þá fyrst og fremst lífríkið,“ segir Jón Gunnar.

Verkefnið felist meðal annars í því að meta verðmætustu svæði landsins.

„Þarna er verið að skapa algerlega nýjan og betri grunn undir skipulagsvinnu, alla áætlun um landnýtingu og fleira,“ segir Jón Gunnar.

Nítíu prósent af allri útivinnu verkefnisins sé búin. Framundan sé að fara í úrvinnslu á öllum gögnum og því mjög slæmt að stöðva verkefni á þessum tíma. Í dag eru fjárheimildir í fjárlagafrumvarpi upp á um 135 milljónir til verkefnisins í trausti þess að sú upphæð verði endurgreidd af Evrópusambandinu, en áætlað hafi verið að vinna fyrir 230 milljónir króna á næsta ári.

Jón Gunnar segist ekki vita hvað verði um það framlag en hann eigi fund með ráðherra um það í næstu viku. Tæplega tuttugu störf tengist verkefninu, sem ekki sé ljóst hvað verði um.

„Ef við vinnum ekki úr gögnunum  koma þau mjög fáum að notum,“ segir Jón Gunnar. Þetta séu því ekki gleðifréttir fyrir Náttúrufræðistofnun.

„Nei, þetta eru skelfilegar fréttir. En aftur á móti erum við líka að skoða lagalegu hliðina, því samkvæmt okkar kokkabókum átti ekki að vera hægt að segja samningnum upp með þessum hætti,“ bætir Jón Gunnar við. Engin uppsagnarákvæði séu í samningnum önnur en sem tengist vanefndum og þeim sé ekki að dreifa í þessum efnum. Hins vegar hefur talsmaður Evrópusambandsins sagt að skaðabætur verði greiddar við riftun samninga.