Þvagi kastað í Cavendish á Tour de France

Einkennilegt atvik átti sér stað á hjólreiðamótinu Tour de France í dag þegar Englendingurinn Mark Cavendish fékk þvag yfir sig frá áhorfenda mótsins.

Atvikið gerðist á 11. degi mótsins frá Avranches að Mont Saint Michel  í Frakklandi sem eru um 33 kílómetrar.

Í fyrstu hélt Cavendish að um vatn væri að ræða en komst fljótlega að því að svo var ekki. Áhorfandi keppninnar henti flösku fullri af þvagi í áttina að Cavendish.

Hjólreiðakappinn vildi alls ekki ræða atvikið þegar BBC spurði hann út í það þegar Cavendish kom í mark.

Bretinn Christopher Froome leiðir mótið eftir 11 keppnisdaga.