Santos fékk bara brot af peningunum fyrir Neymar

Þó svo að Brasilíumaðurinn Neymar hafi verið seldur til Barcelona fyrir 9,2 milljarða króna fékk félag hans, Santos, ekki nema lítinn hluta upphæðarinnar til sín.

Þetta er fullyrt í fjölmiðlum ytra í kvöld en þeir byggja það á fundargerð sem var lekið út. Af rúmum níu milljörðum fær félagið einn og hálfan milljarð.

Barcelona mun hafa greitt um 2,8 milljarða fyrir eignarhaldið á leikmanninum. Fyrrnefnd upphæð rann til Santos og afgangurinn til utanaðkomandi aðila - eignarhaldsfélaga að nafni Teisa Group og DIS. Þau áttu um 45 prósenta hlut í Neymar.

Afgangurinn, tæpir 6,5 milljarðar, renna til annarra aðila. Sá eini sem er tilgreindur í þeim hópi er faðir leikmannsins sem fékk væntanlega vænan skerf fyrir að beina syni sínum í átt til Barcelona ef marka má fréttir brasilískra fjölmiðla.

Fjölmörg önnur félög höfðu áhuga á kappanum, meðal annarra Real Madrid, Chelsea og Manchester City.