Eldsneyti ítrekað stolið af lóð BM-Vallár

Stórfelldur stuldur á eldsneyti hefur átt sér stað hjá BM Vallá undanfarnar vikur, síðast nú um helgina. Lögreglan segir að alltaf sé eitthvað um slíka þjófnaði en að nú megi nánast tala um faraldur.

Bíræfnir eldsneytisþjófar hafa endurtekið farið í tankana á vörubílum hjá BM Vallá á síðustu vikum og nú um helgina töppuðu þeir á fimmta hundruð lítrum af tveimur bílum. Alls hafa á annað þúsund lítra horfið og er tjónið því verulegt. Pétur Hans Pétursson, framkvæmdastjóri hjá BM Vallá, segir að ekki hafi verið settir lásar á tankana því þá sé hætta á að þjófarnir skemmi bílana enn frekar.

„Hluti af svæðinu hér er baklóð sem okkur grunar og við sjáum för, að þeir komi hérna bakatil og hafi fyrir því að fara hérna niður vegginn. Það er eina leiðin, þetta er eina óvaktaða svæðið.“

Svo virðist sem styggð hafi komið að þjófunum um helgina og fannst slanga sem þeir notuðust við á planinu í morgun.

„Það virðist sem þeir noti bara slöngu hér í og nota batterísvél sem er tengd við svona garðslöngu og önnur slanga í brúsa og svo bara dæla þeir úr.“

Þjófarnir leggja því augljóslega mikið á sig til að ná olíunni, enda um gríðarlegt magn að ræða. Pétur vill engan þjófkenna en segir augljóst að þeir fingralöngu noti olíuna til einkanota eða endurselji hana.

„Þeir virðast alveg búnir að þefa það uppi þessu ágætu herrar sem eru að stunda þetta hér, þennan þjófnað, að þetta eru bílar á ólitaðri olíu og þeir eru greinilega í miklum uppgripum í endursölu á olíu sem við eigum.“

Pétur segir að svæðið hafi verið illa vaktað en því hefur verið kippt í liðinn. Settar hafa verið upp fleiri myndavélar auk þess sem vakt verður á svæðinu fyrst um sinn.

„Eldsneytisstuldur hefur átt sér stað víðar undanfarið og virðast þjófarnir oft ansi stórtækir. Lögregla talar jafnvel um faraldur.“