Sorglegt hjá Wetzlar

Kári Kristján Kristjánsson vildi sem fæst orð hafa um þau orð sem Björn Seipp, framkvæmdastjóri þýska úrvalsdeildarliðsins Wetzlar, birti í yfirlýsingu á heimasíðu félagsins í gær.

„Það er mjög sorglegt hvernig þetta er allt saman matreitt," sagði Kári við Fréttablaðið í gær en hann var þá nýkominn til Wetzlar þar sem hann býr með fjölskyldu sinni, konu og tveimur börnum.

„Ég mun eftirleiðis láta minn lögfræðing um að svara fyrir mig. Ég mun ekki leysa þetta í gegnum fjölmiðla," sagði hann enn fremur.

Seipp ítrekaði afstöðu félagsins í yfirlýsingunni en fyrir helgi var Kára Kristjáni sagt upp störfum eftir að hann spilaði með íslenska landsliðinu. Kári gekk nýverið undir aðgerð á baki þar sem góðkynja æxli var fjarlægt og hafði verið frá keppni síðan í febrúar.

Seipp ítrekaði að Kári hefði aldrei fengið leyfi hjá læknum félagsins til að taka sig af sjúkralista félagsins og spila með íslenska landsliðinu í Slóveníu. „Það er fullkomlega ósatt. Það var heldur enginn misskilningur á milli læknanna og Kára," sagði Seipp í yfirlýsingu félagsins.

Hann fór yfir ferlið í löngu máli og sagði að Kári hefði blekkt sig, þjálfara liðsins og læknana með því að segjast vilja fara til Íslands til að fá annað álit lækna þar og frekari meðhöndlun.

„Svo fréttum við í gegnum íslenska fjölmiðla að Kári hefði alls ekki farið til Íslands, heldur til Grosswallstadt þar sem íslenska landsliðið kom saman til að undirbúa sig. Leikmaðurinn sagði okkur aldrei frá því, enda hefðum við gripið umsvifalaust í taumana."

Seipp segir að það sé enginn vafi á því að tengsl félagsins við Kára séu nú endanlega rofin. „Leikmaðurinn sjálfur ber einn ábyrgð á því," sagði hann og hélt áfram: „Að fara of snemma af stað hefði getað haft lífshættulegar afleiðingar í för með sér. Það er mjög sorglegt að Kári hafi ekki farið eftir fyrirmælum reyndra lækna. Ég fæ ekki skilið hvers vegna hann setti atvinnu og jafnvel líf sitt í hættu þegar hann er með konu og tvö ung börn heima hjá sér."

Kári vildi litlu svara um allar þær staðhæfingar sem Seipp lagði fram í yfirlýsingunni. „Ég vísa bara í mína eigin yfirlýsingu sem birtist fyrir helgi. Þar koma fram þær staðreyndir sem urðu til þess að ég spilaði leikinn."

Kári veit ekki hvort hann mætir til vinnu í dag eða hvernig næstu dagar munu þróast. „Þetta er allt óljóst eins og málin standa nú," segir Kári.

Sportið á Vísi er komið á Facebook.