Omam gerir góðverk

Í ágúst síðastliðnum stóð hljómsveitin Of Monsters and Men ásamt Garðabæ fyrir opnum tónleikum án aðgangseyris á Vífilsstaðatúni.

Aftur á móti var allur ágóði af sölu stuttermabola og geisladiska á tónleikunum látinn renna til Barnaspítala Hringsins. Of Monsters and Men ákvað að jafna þá upphæð sem safnaðist og gaf Barnaspítalanum eina milljón króna.

Bolurinn sem seldur var á tónleikunum sló svo rækilega í gegn að hljómsveitin leitaði leiða til að selja hann þeim sem ekki komust á tónleikana og þannig safna enn meiri peningum fyrir Barnaspítalann.

Bolurinn, sem er með mynd eftir tvö börn sem lágu á spítalanum, er nú til sölu í gegnum vefverslun Of Monsters and Men og í versluninni Sturlu við Laugaveg. Allur ágóði af sölu á bolnum fer óskiptur til Barnaspítalans.