Tíu góð ráð fyrir jólamánuðinn

Desember er runninn upp, fullur af skemmtilegum uppákomum og veisluhöldum en jafnframt er þetta tímabil sem margir kvíða. Sérstaklega þeir sem eiga í baráttu við aukakílóin. Jólahlaðborðin, en margir fara á 2-3 slík í desember, auk aðventuveislanna í vinnunni og jólabakstursins heima geta skapað mikinn kvíða og stress fyrir einstakling sem er umhugað um að halda aftur af sér og passa upp á að neyta ekki of margra hitaeininga.

Félagsleg pressa frá vinum og vandamönnum um að smakka og vera með er mikil og gerir fólki erfitt fyrir. Mörgum finnst einnig erfitt að finna sér tíma til þess að mæta í ræktina og viðhalda heilbrigðum lífsstíl. Af hverju ættum við að hætta að næra og bæta líkamann? Ekki hættum við að tannbursta okkur þó að það sé mikið álag hjá okkur.



10 góð ráð fyrir jólamánuðinn



1. Haltu þinni daglegu rútínu og ekki sleppa úr máltíðum yfir daginn.

2. Borðaðu mikið grænmeti og hreint gæðakjöt.

3. Passaðu skammtastærðirnar, notaðu lítinn disk, veldu á diskinn það sem þú telur hollt/betri kost.

4. Drekktu vel af vatni yfir daginn, vatn fyllir magann og eykur grunnbrennsluna.

5. Áfengi er hitaeiningaríkt, í einu rauðvíns- eða hvítvínsglasi eru um 110-130 hitaeiningar, ekki bæta á þig fljótandi og innihaldslausum hitaeiningum, vandaðu valið!

6. Skrifaðu niður raunhæf markmið í jólamánuðinum og límdu upp á ísskáp. Það heldur okkur betur við efnið.

7. Ef þú ert að fara í jólahlaðborð um kvöldið, borðaðu léttan hádegisverð, grænmeti og ávexti yfir daginn og drekktu vel af vatni.

8. Ekki fara í megrun, hreyfðu þig frekar meira.

9. Ekki halda að allt sé ónýtt þó að þú eigir einn slæman dag, það er 31 dagur í desember.

10. Passaðu magnið af óhollustunni sem þú setur í matinn þinn, það er hægt að minnka smjörið, sykurinn og hveitið sem við notum mikið í jólamánuðinum. Maturinn og kökurnar þurfa ekki að bragðast neitt verr og okkur líður betur í kjölfarið.