Stefnt að annarri umræðu um fjárlög á morgun

„Við ætlum að auka framlög til heilbrigðismála um hátt í fjóra milljarða króna án þess að hverfa frá markmiðinu um hallalaus fjárlög,“ segir Bjarni Benediktsson fjármálaráðherra.

Fjárlaganefnd Alþingis er að leggja lokahönd á fjárlagafrumvarpið áður en það kemur til annarrar umræðu sem verður væntanlega á fimmtudag. Vinnan snýst að stærstum hluta um að finna peninga í heilbrigðiskerfið.

Fjármálaráðherra og formaður fjárlaganefndar tilkynntu fyrir nokkrum dögum að barna- og vaxtabætur yrðu lækkaðar og átti það að spara 600 milljónir króna af útgjöldum ríkisins.

Í gær var tilkynnt að fallið yrði frá því að lækka barnabætur og jafnframt var tilkynnt að vaxtabætur yrðu skertar hjá hinum tekjuhærri án þess að búið sé að skilgreina hvað í því felst. Vaxtabætur hinna tekjulægri verða óskertar.

Til að mæta þessu verða framlög til ráðuneytanna skert um fimm prósent.

„Þetta er um það bil jafn há upphæð og hefði fengist með því að skerða barnabætur,“ segir Bjarni.

Einnig er til skoðunar að skerða framlög til þeirra ríkisstofnana sem hafa vaxið hvað mest síðustu ár. Þetta gæti þýtt að störfum hjá hinu opinbera fækkaði á næsta ári.

Þá verða framlög til þróunarsamvinnu skert um 700 milljónir króna frá því sem þau eru í ár.

Bjarni segir að spáð sé aukinni hagsæld á næsta ári og skatttekjur ríkisins komi því til með að aukast. „Við erum að reyna að hagræða í þágu heilbrigðismála. Það er hægt en það þarf pólitískan vilja til þess og það eru ýmis sjónarmið uppi,“ segir Guðlaugur Þór Þórðarson, varaformaður fjárlaganefndar.

Sigmundur Davíð Gunnlaugsson forsætisráðherra segir að það verði að tryggja að þær aðgerðir sem ráðist verði í bitni ekki á hinum tekjulágu. Hann segir að ekki sé búið að hnýta alla lausa enda.

„Vinna við frumvarpið verður í gangi þangað til það verður tekið til annarrar umræðu í þinginu og frumvarpið getur tekið breytingum á milli annarrar og þriðju umræðu,“ segir forsætisráðherra.