Norrænir vaxjakkar frá Farmers Market

Haust- og vetrarlína Farmers Market inniheldur nýja tweed-slá úr íslenskri ull og vaxjakka og slá.

"Við höfum unnið mikið með íslensku ullina og hún hefur verið áberandi í vörulínunni hingað til. Mér þykir voða vænt um þetta hráefni og finnst gaman að vinna með það en mig langaði að gera eitthvað fleira en bara prjón,“ segir Bergþóra Guðnadóttir, eigandi og hönnuður Farmers Market.

Þegar Bergþóra byrjaði að vinna að vetrarlínunni segist hún hafa dottið í lukkupottinn þegar hún kynntist ítalsk-litháískum vefara sem hún hóf samstarf við. Útkoman var köflótt ofin ullarslá úr tweed-efni sem nefnist Myrká. Nýja tweed-efnið hefur alla þessa eiginleika sem íslenska ullin hefur, er hlýtt og hrindir frá sér vatni.

„Allar flíkurnar okkar eru nefndar eftir íslenskum bæjum en við veljum gjarnan staði sem passa við flíkina hverju sinni. Það má segja að þessi slá sem við höfum lagt mikla vinnu í, sé svolítið dulúðleg og dramatísk.“

Önnur nýjung í fatalínu Farmers Market eru vaxbornir jakkar sem fást bæði sem unisex-jakkar eða dömuleg slá. Jakkarnir sem nefnast Skútustaðir eru fóðraðir, hrinda frá sér vatni og eru ætlaðir sem skel yfir til dæmis hlýja peysu.

„Þetta var skemmtilegt verkefni sem var lengi í undirbúningi en það er breska fyrirtækið British Millerain sem hefur búið til þetta vaxborna efni fyrir hermenn, sjómenn og fleiri, alveg síðan árið 1880. Mig langaði því að gera okkar norrænu útgáfu af slíkum vaxjökkum og við erum einstaklega hress með útkomuna.“